mini Binnä-Flottä

Z Houptougämerk setzä ig jewils uf "müglechscht viu Komfort bide vorgäne Abmass wo dür anderi Parameter definiert wärdä. Das chöi zum Bischpiu d Grössi vode Schlöisä si, oder die gsetzlechä Wärtä fürne bstimmtä Uswiis.
Nid minderwichtig isch mir dr ökologisch Gedankä bim Entwärfä vo denä Pötter. So sisi usnahmslos elektrisch atribä, und zum Teil dank Solar- und Windchraftwärk, Trinkwasserufbereitig und Klääralag sogar völlig autark!
Übrigens, miner Schiff si, bis uf ei Usnahm, so bout, dass si d Brügg in Capestang chöi passierä. Die Brügg isch agäblech die töifschti Kanalbrügg in Europa!

Minimoat

Z Minimoat isch es sehr kompakts aber trotzdäm no üsserscht komfortabus Huusboot für bis zu drü Personä.
Dr Namä minimoat isch übrigens ä Verschmeuzig
us de beidä Wörter "Minimum" und "Boat".


z Minimoat in 3D aluegä

Dr Luxplorer isch ä luxuriösä Vierplätzer. Z ganzä Boot isch so usgleit, dases in Europa meischtens ohni irgend ä Uswiis cha gfahrä wärdä, trotzdäm aber es Maximum a Platz bietet.


dr Luxplorer in 3D aluegä

Dr Luxe Motor isch ä moderni Interpretation vom Klassiker unger de Binnäschiff. D Grössi isch so gwäut, dasme no grad keis Profipatänt brucht zum Fahrä.
Das Schiff hie isch mini Beschtimmig...


dr Luxe Motor in 3D aluegä

Beidi Mehrrumpfboot, COBO 1215 und COBO 0609 si aus Bousatz konzipiert und uf sehr gringi Investitionschöschtä usgleit. Si wärdä jewils us modularä Rümpf, Seefrachtcontainer (COBO 1215 us 2x 40' und COBO 0609 us 1x 20') plus Bootsbou-Sperrholz zämebout und chöi sehr individuell umgsetzt wärdä. Z COBO1215 isch z einzigä vo minä Designs wo nid unger dr autä Brügg in Capestang düre ma.


z COBO 1215 in 3D aluegä

z COBO 0609 in 3D aluegä

Z Microat verbindet klassischi Linie mit ultra kompakter Bouwiis. Urschprünglech aus reinä Trailer dänkt, hani du dochno gnue Platz gfundä fürnä Stüürstand und somit chas iz ou ganz säubschtändig uf grossi Fahrt ga.


z Microat in 3D aluegä

Dr Backdecker 1500 isch ä Widerbeläbig vore extrem erfougriichä und beliebtä Bouart us de Afäng vom 20. Jahrhundert. Ig findä d Vorzüg vo derä Bouwiise extrem beschtächend, vorauem für Husboot uf Binnägwässer.


dr Backdecker in 3D aluegä

Z Nanoat isch mi Versuech so kompakt wie müglech doch auä Komfort vomenä Husboot für zwe Personä chönnä z bietä. Zudäm si d Ussämass so gwäut, dasme das Boot ou cha trailerä (ä passendä Bootsahänger isch grad am entstah).


z Nanoat in 3D aluegä

Mitem RVBoat probiereni z Maximum usezholä usemne in Europa no trailerbarä Boot (max. Längi Trailer: 12m / max. Breiti Trailer; Boot: 2.5m). D Form isch durchus chlei abgluegt, dr Innäusbou ä kompletti Eigäentwicklig, usgleit für 2 + 2 Personä.


z RVBoat in 3D aluegä